Geschichte


Wie me hüt no uff dr Pauke ka lääse, sin d‘ Uelischränzer im Joor
1979 gründet worde. Dr Ursprung vo de Uelischränzer liigt
allerdings bi dr Guggemuusig Rhyschwalbe. 1979 sin e Handvoll
Mitgliider ussgstyyge und hän sofort d‘ Idee gha e aigeni
Gugge zgründe. Wo und wie dr Name Uelischränzer entstande isch,
weiss hüt niemer meh so genau. Villicht bi-n-ere fiecht-fröhliche
Rundi in dr Uelistuube?

 

Me het jetzt also e ganzes Joor Zyt gha sich uff d‘ Fasnacht '80
vorzbereite. An dr erschte Fasnacht isch me 16 Naase gsy.
S‘ Goschdym isch e Ueli uss beige-bordeaux-farbigem
Manchesterstoff gsy. S‘ Repertoire het saage und schreibe 9
Stüggli umfasst. D‘ Fasnacht het me guet über d‘ Bühni brocht.

1982 sin 22 Uelis s‘ erschte Mol offiziell dr Cortège gloffe.
1983 isch me dr FG bidrätte.
1984 het me zum 1. Jubiläum e bsunders schööne Ueli welle
mache und het dorum vom beschte Larvemacher uff em Blatz
Basel e Ueli-Larve kreiere lo. Das isch die Form, wo mir bis zum Joor
2003 no für unseri Ueli-Larve brucht hän.

 

1987 hän sich e baar Mitgliider vo de Uelis glööst und hän e
aigeni Gugge gründet, nämlig d‘ Deenli-Spugger.
1991 hämmer die aimooligi Möglichkait gha im sunnige
Spannie an d‘ Vorfasnacht z‘ goh. So hämmer "Arbet" und
"Vergniege" könne verbinde und hänn die drei Dääg gnosse.
Drfür hämmer‘s denn an dr Fasnacht locker gno. Me isch
nämlig dr Cortège nit gloffe, sondern gfahre. Als Senne hämmer
700 Jöörli Aidgenosseschaft uff eme Waage gfyyrt.

1992 hän mir als Guggemuusig bim allererschte Mimösli dörfe drby
syy. Es isch e tolli, aber au zytintensivi Erfahrig gsy wo mer alli
nit mechte misse.

 

Nach vyyle verschiidene Broobelokal in dr Vergangehait, hän mir 1994
d‘ Meeglichkait bekoo im ehemoolige Rest. Transit im Estrich e
Broobelokal yyzrichte. Ainzigi Bedingig: mir mien en sälber ruume und
umbaue. So isch während mehrere Wuche gsägt, ghämmeret und
gschruubt worde, bis mir im August 1994 s‘ erschte Mool in unserem
aigene Estrich hän könne broobe.
Siibe Joor lang sin mir woorschyynlig die ainzigi Gugge gsy, wo im
ene Estrich broobt het. Mir hän tolli Feschtli gfyyrt deert oobe und au
mänggi Krise mitenand überwunde. Im 2001 het denn aber dr Pächter
gwäggslet. Im Parterre isch e Bunny House igrichtet worde und mir hän
uns wohl oder über e neui Blyybi miesse sueche. Sit im Novämber 2001 sin
mir jetzt bi de Haanedropfer und fühle uns dört sehr wohl.