UNSERI GSCHICHT
D' Guggemuusig Uelischränzer Basel isch im Joohr 1979 als Abspaltig vo dr Guggemuusig Rhyschwalbe gründet worde. Über d Entsteehig vom Name, wird bis hütt gmungglet.
Im Jahr 1980 syn d Uelis s erste mol an dr Basler Fasnacht presänt gsy und im 1982 s erste mol am Cortège mitgloffe.
Bis Ändi vo de 90er-Joohre syn mir bi dr "FG" biiträtte, hän e Vorfasnacht in Spanie erläbt, am Cortège mitme Waage mitgmacht, im 92ig s erste mol uf dr Mimösli-Bühni gstande und unsere eigene Estrich-Käller bezoge.
Im 98ig hän mir bim Wältrekordversuech im alte Joggeli mitgmacht, wo mit 2'811 Fasnächtler:inne die grössti Formation bildet, und sogar no zwei Lieder gspyylt worde syn.
Und denn, im 2004 syn mit s erste mol in rot-schwarz gloffe! S' Johr druff het's unsers erste "Ueli-Fescht" gääh und im 2006 die ersti CD-Ufnahm. Syt 2007 syn mir als "Wildi Gugge" unterwäggs, unsers Fescht isch zum "GUGG THE MUUSIG" umtauft worde, mir hän s erst mol am Clara-Monster mitgemacht und sogar inere Wohnig gspyylt.
Im 2014 het's zum 35. jööhrige Jubi e neui CD, und sogar e eigene Fasnachts-Querschnitt uf DVD gääh. Mir syn uf Münche unsers Jubiläum go fyyre und hän eimol mehr am Mimösli dörfe mitwirke.
Im 2018 hän mr unsere erste eigene Käller bezoge, und usm "alte AGB-Käller" isch dr "Ueli-Käller" entstande.
Zum 40-Joohr Jubiläum im 2019 syn mir wieder bim Mimösli uf dr Bühni gstande, hän e neus Stammgoschdyym dörfe präsentiere und uf Köln go fyyre.
Jä, denn isch Covid ko und wie alli andere hän mr unseri Zyt mit Usseproobe verbrocht und ghofft, das ändligg wieder richtig ka Fasnacht sy!
Zum 45. Jubiläum im 2024 het's leider kei neus Stammgoschdyym gä, sondern nur neui Goldigi Glöggli - mir hän leider nach dr Pensionierig vo unserer langjährige Schnyydere kei Nochfolg gfunde.
Das Drama mit dr Schnyydere het sich bis im 2025 wyterzoge und drum syn mr e wyyteri Fasnacht "Charivari" gloffe, mitere Mischig vo alte Sujet-Kostüm. À propos "Charivari": Im 2025 hän mir d Ehr ka, als ersti gmischti Gugge syt langem, am Glaibasler Charivari uf dr Bühni unsers Beste gääh.
Und im 2026 isch sie ändligg do gsy, unseri neui Schnyydere - do hän mir uns doch grad e schygge Altfrangg als Sujetgoschdyym gönnt - wo vo vyylne Menschen bestuunt worde isch.
To be continued... ;-)
